EL REINU D'ASTURIES - ASTURORUM REGNUM

[astúricu]

Reinu d'Asturies



El Reinu d'Asturies formóse tres la victoria de Pelayo na batalla de Cuadonga en 722, estableciendo la capital en Cangues d'Onís. Tres la muerte del so sucesor Fávila, Alfonso I, casáu cola fiya de Pelayu Ermesinda autoproclámase como'l primer rei d'Asturies, magar que años dempués Silo proclamábase como princeps.


Alfonso II conquísta Lisboa en 798, tresllada la Corte a Uviéu y repobla Galicia, Castiella y Llión.

Cola muerte d'Alfonso III el reinu divídese ente los tres fiyos, siendo Fruela II rei d'Asturies, pero pocu tiempu dempués reconoz al so hermanu Ordoño II de Llión como rei.


L' Asturorum regnum, la forxa d'una identidá nacional histórica asturiana.

Tres la derrota de los godos polos musulmanes na batalla'l Guadalete nel 711, éstos invaden y conquisten la Península Ibérica, ensin atopar gran oposición d'una sociedá como la visigoda con estructures decadentes, tarazada en clases y yá somorguiada nun procesu de feudalización. Ensín embargo, esta oposición sí se dá ente musulmanes y ástures, oposición que yá s'espeyare contra los visigodos y contra los romanos, y como espresaben los profesores Barbero y Vigil "respondía a una profunda oposición entre sus respectivas organizaciones sociales". Magüer la influyencia de Roma nel territoriu de l'Asturia transmontana, caltuviéronse llargo tiempu formes sociales xentilicies, ensin grandes latifundios nin ruptures sociales. Amás, la desarticulación del sistema alministrativu tardorromanu, aguiyáu poles invasiones xermániques, afaló l'autonomía de los ástures, y otros pueblos norteños, viniendo ser ésta una vraera independencia na práctica. Tamién les sos formes sociales tradicionales, de calter xentiliciu, viéronse fortalecíes. Nesta sociedá, con evidentes güelgues d'arcaismu, la población yera mayoritariamente llibre y ensín campesinos reducíos a la servidume, y entá nun algamare una estructura política con carácter estatal. Nesti contestu tien llugar la batalla de Cuadonga nel 718, fechu envolubráu na grandilo cuencia mitificadora, y la escoyeta de Pelayo -probable xefe local astur, según les últimes investigaciones- como princeps nun conceyu de xefes tribales -duces- na redolada del monte Auseva. Esti fechu bélicu marca l'aniciu de la Monarquía asturiana cola instalación de la corte en Cangues d'Onís. La consolidación del reinu vién marcada pol treslláu de la corte a Santianes de Pravia -probablemente l'antiga Flavionavia, a la vera'l Nalón-, y depués a Uviéu, la definitiva capital. Estremaes coyuntures favoratibles permitieron la espansión territorial del Reinu a l'actual Galicia, y tamién al Este y al Sur, asina como la ellaboración de polítiques tendentes a la so consolidación. La Monarquía asturiana preséntasenos como un procesu d'evolución política que dende una xefatura militar algama a cristalizar nun reinu de calter feudal. A lo llargo de los cuasi dos sieglos que dura la Monarquía asturiana, los estremaos soberanos desendolquen estratexes tendentes a la consolidación política del so Estáu independiente. Asina tenemos creaciones artístiques como l'Arte Prerrománicu Asturianu, braeru arte aúlicu, enmarcáu nun procesu de fundaciones rexies pa da-y prestixu y presencia al poder real asturiano; o el descubrimientu en tiempos d'Alfonso II (791-842) del hipotéticu sepulcru del Apostol Santiago en Compostela, fechu de fonda trescendencia política y cultural que s'esplica poles necesidaes polítiques del Reinu asturianu nesi momentu hestóricu; o la polémica que contra l'obispu toledanu Elipando y les sos tesis adopcionistes caltién Beato de Lliébana, defendiendo la ortodosia y la independencia de la Ilesia asturiana frente a la Ilesia mozárabe hispánica.

Al empar, vei afondándose'l procesu de feudalización de la sociedá del Reinu asturianu y consolidándose una clase dirixente señorial y eclesiástica que van ellaborando l'ideal goticista -nel qu'intervinieron activamente mozárabes emigraos d'Al-Andalus- como xustificación ideolóxica de la so dominación y que s'espeya de forma contradictoria nes cróniques escrites en tiempos del rei Alfonso III (866-911), últimu soberanu que tién la so sede en tierres asturianes. A la muerte del rei Magno, el so fíu, Ordoño II, fai real el treslláu de la Corte a Lleón, esplicable pola espansión y consolidación teritorial y la circunstancia de qu´otra base social y otru estadíu d'evolución ye la basa de la estructura política de la Monarquía dende l'espardimientu del ideal y programa goticista. De magar entós, Asturies queda atrás, alloñada y ayena a les fontes de poder y decisión qu´anteriormente foron-y propies. La sociedá asturiana sigue evolucionando dientru del xeneral procesu del feudalismu occidental, anque más bien impermeable a aspeutos superestructurales goticistes.






El Reinu d´Asturies
Arte. El prerrománicu Asturianu
A lo llargo'l so andar el Reinu d'Asturies llexitimará'l so ideal como estáu al traviés d'un programa ideolóxicu qu'atopará nes artes l'encontu principal d'espresión del so conceptu de civilidá, del so prestixu y la so singularidá diferenciaora. Asina, ente los sieglos VIII al X, afitándose na xunidá'l Reinu y na voluntá firme de los monarques, desendólcase la xénesis y l'esplendor d'una producción artística de perbayurosa diversidá dientru d'un patrón unívocu: ye lo que Xovellanos va llamar Arte Asturianu, y que ye parte na so sencia del complexu mundu del arte prerrománicu occidental. Na so evolución, los autores identifiquen cuatru dómines o etapes: A) Paleoasturiana (722-791), coincidiendo colos anicios de la monarquía ástur ; B) Reináu d'Alfonso II (791-842), d'afitamientu políticu ya ideolóxicu cola erección d'Uviéu en Regia Sedes; C) Arte Ramirense, coincidiendo col reináu de Ramiro I (842-850); D) Reináu d'Alfonso III el Magnu (866-910), dómina d'espansión repobladora y fundaciones áuliques qu'orixina un ricu eclecticismu per Lleón, Palencia, Galicia y norte de Portugal. Nesti xorrecimientu cultural destaca una arquitectura d'orixinal belleza, tanto poles sos soluciones construcctives como polos motivos decorativos, destacando a modo les pintures murales (Ilesia de Santullanu de los Praos), o mesmo la propia decoración arquiteutónica al traviés de la plástica lligada a los propios elementos estructurales (Palaciu de Santa María'1 Narancu, S.Miguel de Lliño...), ensin escaecer la orfebrería : Cruz de los Ánxeles (Alfonso II) o la Cruz de la Victoria (Alfonso III), símbolu del Reinu d'Asturies y angüañu escudu y bandera del País, montada nun alma de madera que pa sigún la tradición llevare Pelayo na batalla de Cuadonga. Y onde tamién son detectables, especialmente na dómina d'Alfonsu II, les influyencies europees, particularmente carolínxes, pareyes al afitamientu de les rellaciones polítiques ente'l Reinu asturianu y 1'Imperiu de los francos.

La fundación del monasteriu de Santu Toribiu de Llébana data del s. VI, pero la tradición del Lignum Crucis resurde nel sieglu VIII nel Reinu d'Asturies, al que dende los sos oríxenes perteneció La Llébana. Los monarques asturianos protexeron el monasteriu y tomaron la idea de salvaguarda de la Cruz de Cristu como un fin personal y políticu del naciente Reinu. La hestória del Lignum Crucis a qu'esta llegó dende Xerusalén a Astúrica nel s. V afuxendo de la invasión musulmana abellugándose dientro les montañes llebaniegues y que l'obispu d'Astúrica Santu Toribiu la traxo a Les Asturies allugándose definitivamente nel monasteriu llebaniegu. Dende entós el Lignum Crucis considérase una de les reliquies más importantes del Cristianismu y el monasteriu, un centru hestóricu de pelegrinaxe.
Durante el reináu d'Adefonsu II d'Asturies atópase en Compostela nel añu 810 la supuesta tumba del apóstol Santiagu. Esti fechu foi motiváu precisamente pola obra d'un monxu asturianu, nomáu Beatu, qu'espardió la idea de que l'apóstol predicara en tierres d'Hispania. El Beatu asturianu foi famosu poles argumentaciones suyes contra la doctrina adopcionista que cuasi llegó ésta a trunfar na península y especialmente pol so códice manuscritu en llatín que decoró con inmeyorables dibuxos: el llibru de los Comentarios al Apocalipsis, más conocíu güei cono El Beatu de Llébana, obra lliteraria y cimeira del arte altomedieval asturianu, el más importante códice relixosu asturianu, que na so época tuvo una gran difusión y actualmente ta depositáu na Biblioteca Nacional de Madrid.
Antiguamente munchos plegrinos llegaben pel mar a Asturies y diben a Santu Toribiu pel desfiladeru del ríu Deba en La Hermida pasando llueu pa Lleón y enllazar asina col camín de Santiagu. Tanta yera la fama del Lignum Crucis y del xubiléu llebaniegu. Hai constancia de la esistencia d'un hospital de pelegrinos en Santu Toribiu nel s. XIII.
La Llébana, cuna del rei Pelayu según tradición popular llebaniega, centru espiritual, hestóricu y orixinariu del Reinu d'Asturies espera nesti añu santu la visita de munchos qu'entá nun conocen una de les tierres con más hestoria, tradición y asturianidá de tol ámbitu de Les Asturies.

Toles cróniques cristianes falen del ASTURORUM REGNUM, el "Reinu de los Astures", y así ye como los creadores del reinu se consideraben, como asturianos, como astures.

L' emperador Caracalla realizó una reorganización de les provincies nun sólo d'Hispania, sinón de to'l imperiu, col oxetivu de tener un control mayor sobre les alministraciones provinciales. Na Península Ibérica, l'emperador procedió a segregar a tres "conventi" (Bracarense, Asturicense y Lucense) de la provincia Tarraconense, creando con ello una nueva entidá, la provincia de Gallaecia.

D'ehí vien la costumbre de qu'en época tardorromana o altomedieval teníen los cronistes de llamar "Galicia" al Norte de la Península. "Gallaecia" nun yera más que un términu xeográficu, qu'abarcaba dende Finisterre hasta los Pirineos.

Un error que se pretende agora ye identificar a esta "Gallaecia" cola actual comunidá autónoma de Galicia. Un reinu que tenía la capital en Cangues, Pravia y Uviéu, que se denominaba a si mesmu como "Asturorum Regnum", y cuyos principales logros artísticos (prerrománico, cámara santa, cruz de la Victoria) tan situaos en territoriu asturianu.

Les cróniques cristianes y el Romanceru medieval déxenlo bastante claro: La entidá política llamábase ASTURIES y si delles cróniques árabes falen de "Djalikiah" , PORQUE LOS MUSULMANES TINÍEN LA COSTUMBRE DE LLAMAR GALICIA A TOL NORTE DE LA PENÍNSULA:

"Cuantan algunos historiadores musulmanes que, el primero que reunió a los fugitivos cristianos de España, después de haberse apoderado de ella los árabes, fue un infiel llamado Pelayo, natural de Asturias en Galicia"

"Los islamitas, luchando contra los politeistas y forzándoles a emigrar, se ha habían apoderado de su país hasta llegar a Aruyula, de la tierra de los francos, y HABÍAN CONQUISTADO PAMPLONA EN GALICIA y no había quedado sino la roca donde se refugió el rey llamado Pelayo con trescientos hombres."


Ye de notar dotramiente el valor territorial que los romanos concedieron de siempre al pueblu de los Ástures, aínda yá dende antes de la conquista, dándo-yos relevancia sobremanera como ente nacional y territorial específicu. Ello pruébase gracies al nome propiu col que designaron al nuevu conventu dende'l primer momentu y ello debío a que los romanos nun inventaron un nome nuevu pal territoriu nin pa los sos habitantes sinón qu'acepten como oficial el yá esistente, prueba de que yá yera asina conocíu dende antes como territoriu astúricu. Asina los mesmos romanos siempre falen d'una gens Cantabrorum y d'una gens Vaccaeorum, pero pol contrario tienen siempre claro la idea xeográfica d'una Asturia. En tiempos de Dioclecianu (añu 289, sieglu III) decídese crear una nueva provincia, la Provincia Nova Asturie et Gallaeciae, axuntando los trés conventus, el Asturum , Lucense y el Bracarense, rescatando asina división alministrativa fecha anteriormente por Caracalla pero que nun debió sobrevivir al so reináu. Mui posteriormente apaez la idea espacial d'una Gallaecia axuntando idealmente los territorios Lucense y Bracarense baxo esta sola denominación, idea acentuada precisamente cola creación de la nueva provincia. La provincia d’Asturia y Galecia axuntaba, como se dixo enantes, los anteriores conventos Asturum, Lucense, Bracarense nuna nueva entidá superior, como provincia imperial separtada de la Tarraconense debío a la so llonxanía con Tarraco. Col tiempu esta Nova Provincia pasó a designase comunmente polos xeógrafos nes sos descripciones col solu nome más abreviáu de Gallaecia en parte debío a la situación de la so ciudá capital de Lucus Augusti, un allugamientu de fundación más antigua, si bien el nome oficial facía referencia a estos dos entes territoriales yá conocíos. El territoriu d'esta nueva provincia d’Asturia y Galecia tamién camudó algamando hasta la fonte del Ebru (hasta'l valle del Nansa o Saja), dixebrándose asina oficialmente toos estos territorios de los de la provincia Tarraconense. Ello confirmaría la espansión de los Ástures o de la so influencia hacia l'Este, amestando zones de la gens cantabrorum y vacceorum pal Conventus Asturum dientro yá de la Nova Provincia diocleciana.

Con too hai que remembrar que'l nome y la idea xeográfica d'Asturia yeren bien conocíos na metrópoli romana, non sólo polos diez llargos años de guerres astúriques que requirieron la presencia del propiu emperador Augustu nel insurrectu país de los Ástures, sinón porque Asturia tamién yera conocío por ser un país ricu en mines d'oru, industria que los Ástures desenrollaron y que de fechu suponía ún de los obxetivos d'interés máximu pa la economía del Imperiu. Asturia conocíase tamién en Roma por suministrar los perconocíos caballos asturcones pal exércitu y pa les carreres del circu.



Plinio refiérse a la regio de los Ástures y al conventus de los Lucenses pero sorprende que nunca se señalen más fronteres ente etnies que les meramente alministratives, frutu de la política militar ya imperial diseñada dende Roma. Y ello porque como asocedía notros pueblos de la Europa céltica, les fronteres de los Ástures colos Cántabros, Vacceos, Vetones, Lusitanos, Lucenses o Bracarenses yeren imprecises, permeables y de pocu valor dixebrador. Por exemplu sábese que los Ástures cohabitaben y compartíen pacíficamente territoriu colos Vadinienses nel mesmu valle del Ástura y lo mesmo asocedería nel del Seya, nel Navia y notres zones de frontera con otros pueblos vecinos y prósimos culturalmente. La mesma agüa del ríu Ástura debió ser propiedá compartida d'Ástures y Vacceos pues como quedó dicho convivíen pacíficamente nel mesmu valle, anque per otru llau y oficialmente, el ríu sirvía d'afayadiza y precisa llende conventual pa l'alministración romana. Hai que tener en cuenta que los romanos usaron los ríos como fronteres por razones práctiques yá que carecíen de mapes al usu mentantu que pa los pueblos célticos los ríos nun podíen ser otra cosa más qu'elementos compartíos y sagraos de xuntura y convivencia pacífica. El datu de que los romanos atoparen más similitúes que diferencies ente los pueblos de la cornisa ye sintomático d'esti posible continuum cultural o panceltismu y de les probables influencies y intercambios recíprocos. De les posibles diferencies llinguístiques nun nos queden guei pruebes, pues anque la celtización del norte peninsular (entamada primeramente hacia'l sieglu X aC) foi xeneralizada non debió resultar de tal xeitu que diera llugar a un total uniformismu idiomáticu sinón que debió haber diferencies y variantes llinguístiques nun territoriu tan ampliu y ailláu como'l nordés de la península d'Hispania. Feches estes precisiones y como señala Uría Ríu ye asegurable qu'el territoriu de los Ástures algamara dende Valdeorras, El Bierzu, l'Altu Navia, Ibias, Valledor y xerra d'Ancares hacia l'este y que la so zona d'influencia llegara hasta la Riba de San Vicente y dende la costa hasta los valles del Esla y Cea y del Dueru. Asina dende un puntu de vista estrictamente étnicu, naquelles dómines los actuales territorios d'Ibias, Ancares, El Bierzu, Suarna o Negueira yeren d'etnia ástur mentantu que los d'Amieva o Onís yeren de la etnia vadiniense (cántabra). Lo que vien a dicinos que'l sustratu étnicu antigu nun tien por qué predeterminar una presunta correlación col ethnos xenéricu nin muncho menos col ethnos resultante o actual puesto qu'evoluciona y por supuesto tampoco ello va determinar les arbitraries y bien de veces imprecises y camudables divisiones alministratives que la organización imperial romana iguó nel teritoriu, divisiones que ciertamente nun habríen siquiera de ser conocíes pol pueblu llano y que en tou casu nun facíen nenguna función de barrera o separtación de la población dao que Roma favoreció siempre tou tipu d'intercambios, movimientos y mestizaxes. Hai que remembrar qu'Asturia yera'l territoriu más montañosu de tolos que na península hispana allugaben pueblos autóctonos y amás alcontrábase mui densamente poblao, siendo estos datos si cabe los más determinantes a la hora d'analizar los oríxenes y los ámbitos del ethnos resultante.



Los Ástures caltuvieron la so especifidá étnica y el so etnónimu nacional durante y depués de la dominación romana frente al homoxenizador Hispani col que se nomaba al restu tribus ibériques salvo los Gálaicos o Cálaicos , Cántabros y Váscones, que tamién teníen como los Ásturi, el so xentiliciu específicu.

Los romanos solíen referise a los Cántabri como una gens mentantu que al empar caltuvieron siempre una afitada noción territorial d’Asturia como posteriormente de Gallaecia. Non obstabte, el nome de Gallaecia nun surde nun principiu como nome d'un ethnos xenéricu o un pueblu ampliu sinón sólo como etnónimu d'una sóla tribu, la de los KallaiKoi. Asina, el procesu de consolidación de la Gallaecia como entidá territorial nun foi inmediatu sinón que requirió un llargu tiempu: nun principiu los Kallaikoi que recueye Estrabón yera'l nome d'una sóla tribu asitiada al norte del Dueru lusitanu contra la que los romanos llevaron alantre una llonga guerra, asina el xentiliciu de los Calaicói pasó a nomar non yá a esta tribu del baxu Dueru sinón a toles tribus y etnies allugaes indistintamente al norte de la Lusitania nel nordés peninsular. Tres una etapa de falta de reconocimientu de la so entidá propia como territoriu, (cuando l'etnónimu xenéricu yera Lucenses y Bracarenses), y na que se la lligaba a otros entes territoriales yá afitaos como la Asturia o la Lusitania, foi necesario un creciente afitamientu d'esti etnónimu tribal ( los Callaicus, Callaeci, como se nomó a tolos pueblos del nordés y del norte del Dueru lusitanu) que llevará nel sieglu III a consolidar oficialmente este nome de "Gallaecia" xunto al d’Asturia como'l nuevu topónimu yá con categoría de Provincia (de tipu imperial y non senatorial) esgayada de la Tarraconense y qu'axuntaba alministrativamente una amplia estensión abarcando tierres y pueblos estremaos, que si bien nun yeren sólo étnicamente Kallaikói, nin Callaeci o Gallaeci, puesto que la nueva provincia axuntaba tanto a Ásturi como a Cántabri, Vaccei y otros pueblos del nordés dientro toos ellos d'una nueva gran unidá alministrativa nomada oficialmente Provincia Nova Asturie et Gallaecia. La llende d'esta nueva provincia cola Tarraconense parez qu'algama hasta Iulióbriga, nes mesmes fontes del Ebru y tamién según dalgunos hestoriadores a les del Dueru. Asina lo entiende la Notitia Dignitatum de fines del s. IV sobre repartu de tropes y lo mesmo Orosiu y San Isidoru (Etimoloxíes XIX) qu'inclúin dientro la provincia Asturiae et Gallaeciae a tol territoriu hasta la fonte del Dueru. Esta nueva provincia d'Asturia y Galecia foi resultáu como s'apuntó enantes de la reorganización territorial del Imperiu fecha por Dioclecianu nel 289 y yera muncho más amplia que los anteriores conventos de Lucus, Brácara y Asturum xuntos pues como reiteramos algamó territorios muncho más pal Este, incluyendo non sólo a la gens Cantabrorum sinón tamién al territoriu de los Vacceos, esto ye, ametiendo-y bona parte del anterior Conventu Cluniense, esto ye.: amplianto el Conventus Asturum hacia l'eEste.

Yá anteriormente en tiempos de Tiberiu dixébrase a la tarraconense en trés legatus , unu d'ellos con xurisdicción en Asturia et Gallaecia, el legatus Asturiae et Gallaeciae, quizabes un precedente que motivara la idea de dixebrar la Tarraconense axuntando los conventos de Lucus, Brácara y Asturorum nuna sola y nueva provincia imperial.

Los romanos estremaron entre los Ásturi tresmontanos y los cismontanos o augustanos, respectivamente al norte y al sur de la Cordalera Asturiana o IVGA ASTURUM. Si bien la Cordalera nunca foi un elementu dixebrador pa los Ástures sí ye cierto qu'esta foi una torga pa la romanización, más intensa na zona augustana que na tresmontana. Si nel sur florescíen les nueves ciudaes, pel norte calteníense la xixilancia y les fortificaciones militares romanes pal control de la población tresmontano que paez ser vivía más espardida pel territoriu de los valles si bien les nueves escavacionesvan amuesando cada vez más y mayores focos ciudadanos y agrupamientos cívicos importantes de pueblamientos astures dientro la rexón tresmontana.

La invasión sueva asina como'l nuevu reinu visigodu de Toledo tuvieron los dos poca presencia efectiva nel territoriu astur, especialmente nel tresmontanu, tan alloñáu y periféricu pa ellos. La presencia de miembros de l'alministración d'estos reinos xermánicos foi tan sólo episódica y básicamente pa recaldar tributos o pa sofocar rebeliones. Les cróniques cunten griesques de los Ástures y campañes militares de castigu contra éstos por parte de los reis toledanos inclusu hasta principios del s. VII (les guerres defensives contra Witericu y Sisebutu). Chindasvintu amplió a ocho les provincies cola creación de la Asturiensis qu'incluyía l'antigu territoriu de los Vadinienses, (respetando la mesma ampliación del Conventus Asturun hacia l'Este de la época de Dioclecianu), territoriu consolidáu asina como un territoriu más d'Asturia, del so ethnos, y que posteriormente sedrá solar o bierzu del futuru Reinu de los Ástures.

Nesta dómina caltenemos solo la noticia referida a la persona del padre del Rei Pelayu, el Duque Favila, que se supón natural d'esti territoriu pues poseía grandes propiedaes nél y tamién cabe mentar les fontes de la tradición popular que sitúen el llugar de nacencia del Rei Don Pelayu en tierres de La Llébana, en concretu nel pueblu de Cosgaya. Fora de la península d'Hispania el cosmógrafu anónimu de Rávena nel s. VII tamién mencionaba a Asturia como una provincia goda pero la escasa presencia del estáu godu n'Asturia fizo qu'el territoriu siguiera aínda escasamente romanizáu y ensin cristianizar. Xurídica, social y relixosamente los Ástures caltuvieron el so mundu, ablugaos al norte los montes astúricos nel so hábitat pobláu de cientos de castros o castiellos, asentamientos colectivos y defensivos o bien de manera disperso siguiendo un modu de vida rural, agropecuario o pesquero. Les úniques ciudaes relevantes na zona tresmontana yeren los vieyos allugamientos de Lucus Asturum, Noega-Gigia, Portus Vereasueca y Flavionavia. Más importantes y bayuroses yeren les ciudaes del sur: Astúrica y Legio. Prácticamente nun hai restos cristianos relevantes d'esta dómina y amás l'Asturia tresmontana aínda nun tenía obispáu. Una de les primeres fundaciones monástiques nel territoriu foi la de Santu Toribiu de Palencia nel Altu Deva (La Llébana) nel s. VI y la de San Fructuosu del s. VII nel Bierzu. La relixón pagana yera xeneralizada nesta dómina. El pueblu astur caltenía unos ritos máxicos, telúricos, astrolóxicos y espirituales que munches veces teníen una función práctica, como los rituales adivinatorios, o d'auguriu, pa saber el meyor día pa semar, facer una casa o casase. Otros ritos máxicos evitaben l'agüeyamientu, les enfermedaes, les plagues o'l granizu. Honrábase a mures y polilles pa protexer colleches y ropa. Nos ritos d'iviernu los homes antróxábense con pelleyos d'animales. Practicábase'l cultu a les fontes, arboles y peñes a los que se-yos ufiertaben ramos y veles. El lloréu protexía les puertes de les cases contra'l mal. El Texu yera l'árbol sagráu y protector. Siguíen ritos de cultu a Mercuriu los miércoles tirando piedres nun amaciñu y rezando a Minerva les muyeres que texíen. Estes tradiciones máxiques y astrolóxiques del pueblu espliquen el pocu frutu que tuvieron los predicadores y ermitaños cristianos y per otru llau consoliden n'Asturia el trunfu del priscilianismu. Apúntase que la tumba atopada y venerada depués en Compostela n'época d'Adefonsu II el Conquistador nun ye otra que la de Priscilianu. Esta tardía y escasa romanización y sobre too escasa cristianización ye precisamente unu de los sustratos destacaos na configuración y evolución del ethnos asturianu que tratamos.

La definitiva cristianización del pueblu Ástur y la introducción del derechu y les estructures romanoxermániques van consolidase definitivamente col surdimientu del nuevu estáu independiente: el Regnum Asturorum, el Reinu de los Ástures. El Derechu romanogodu, el Liber Iudiciorum, compiláu polos reis visigodos va implantase como Derechu escritu oficial asina como la relixón cristiana y dirán espardiéndose pel territoriu mediante una incipiente organización estatal, (monarquía, nobleza, cleru, exércitu) na que Ilesia y Estáu van xuntos na común misión de consolidar el Reinu y de defendelu contra la menacia del Islam, idea de la qu'el pueblu pronto va decatase amparándose asina nel nuevu Reinu de los Ástures y asumiendo llueu la so causa . Destamiente, el nuevu Estáu asturianu sírvese de la Ilesia identificándose con ella, como mediu d'espansión y lexitimación divina del poder estatal , y la Ilesia pel so llau cumple una perimportante misión na consolidación, espansión y santificación del Reinu astur desenrollando importantes funciones estatales y organizatives: la fundación de conventos reales pelos valles, l'alministración y organización de territorios, la colonización, cristianización y repueblación de nueves tierres ye imparable, fecho too ello cola protección del nuevu Reinu y del so real símbolu: la santa cruz.

Estinguíu el reinu visigodu cola invasión árabe, el nuevu Estáu astur dende'l so centru fundacional de Cangues y llueu dende Uviéu , escomienza primero una espansión y conquista hacia l'oeste y Galecia , estabilizándose asina internamente y depués hacia'l sur nun llongu periodu que se conoz como la Repueblación dientro too ello d'una política estatal espansionista de tipu imperial llevada alantre polos sucesivos monarques asturianos como una política d'estáu, con constantes lluches contra l'Emiratu de Córdoba, que permitirá non sólo enanchar el Reinu sinón asegurar la so defensa mediante grandes zones despoblaes de frontera primero que llueu yeren repoblaes y colonizaes. Con Adefonsu III el Grande el Reinu algama'l so mayor puxu y espansión territorial enantes de la segregación de Castiella y Portugal, fechos estos que dirán debilitando'l Reinu. El territoriu del Estáu asturianu algama con Adefonsu III el Grande dende Galecia al territoriu de los vascones (hasta'l Nervión) y de les costes del norte a la estremadura sur del valle del Dueru. Too ello con constantes lluches y menacies frente al poder del Islam na península. Por ello, y pa defender al Reinu na so frontera este, Adefonsu el Grande decide fortificar tola zona fronteriza de Bardulia con poderosos castiellos defensivos, zona ermo que depués conoceríase precisamente como la tierra de castiellos o “Castiella”. El mesmu monarca asturianu funda tamién la ciudá de Burgos dientro d’esta política de consolidación fronteriza del Estáu. En morriendo Adefonsu III el Grande, los sos trés fíos repartiéronse’l Reinu asturianu: Fruela II foi rei d’Asturies nle norte, Ordoñu II foi rei en Lleón y García quedóse con Galicia.

Relevante ye l’afitamientu de Legio como capitalidá política d’Ordoñu II dende’l 912 y la posterior consolidación de Castiella y de Portugal como condaos independientes y llueu como Reinos esgayaos del Asturlleonés. Los trés reinos cristianos van llevar alantre la reconquista xuntos pero tamién con constantes guerres y anexiones ente ellos y con polítiques espansives de les que va salir trunfante Castiella que terminará ametiendo al vieyu reinu d'Asturies y de Lleón baxo una sola corona castiellana.

Otru datu perimportante na configuración del nuevu ethnos ye'l nacimientu del romance asturianu, el surdimientu del asturianu o asturlleonés como llingua escrita y documentada per primer vez nel Fueru d'Avilés (copia del añu 1155, s. XII).

[Eli]

Interesantisimo, gracias por ponerlo.

El unico problema fue el Castellano que no lo hablas muy bien que digamos pero en fin...

Sabes de libros de historia 'en Español" que traten sobre esto? 'El Libro' tiene algunos en-linea http://libro.uca.edu/title.htm pero ninguno (que yo sepa) trata esta epoca/territorio en detalle. Aunque he ojeado a todos la verdad es que solo he leido unos cuantos hasta ahora.

Gracias de nuevo.

[Eli]

Hacen algunos dias encontre este enlace que me parce bastante bueno

http://www.geocities.com/urunuela24/rio ... bierta.htm

talvez te interese.

Elí