Asturian-American Migration Forum

La custión de los límites históricos d’Asturies y los límites alministrativos


Xaviel Vilareyo



Asturies ye unu de los territorios históricos que tien los sos límites espaciales tradicionales más claramente finxaos y delimitaos. L’ámbitu históricu d’Asturies nun pue ser más precisu y afitáu: Les Asturies son la tierra comprendía ente’l cursu enteru del ríu Eo hasta’l ríu Miera y dende los puertos de montaña divisorios de vertiente d’agües hasta la mar atlántica.

Esti territoriu hestóricu de lo que ye Asturies sodivídese asinamesmo en dos territorios hestóricos: l’Asturia d’Uviéu y l’Asturia de Santillana, l’Asturies occidental y la oriental de les qu’el ríu Deva fai xuntura más que separtación. Del Eo al Miera, del Picu Miravalles al Puertu Piedrasluengas hai una llinia trazada pola hestoria milenaria d’un territoriu hestóricu que se noma a si mesmu como Asturies.

Sin embargo los límites hestóricos de les Asturies van alterase y recortase minorizando darréu el so ámbitu hestóricu y cultural mediante una dixebra alministrativa frutu de la reorganización racionalista y centralista llevada alntre pol Estáu lliberal hespañol emerxente a partir del constitucionalismu de 1812 qu’aspiraba a camudar dafechu tola estructura y organización territorial de la vieya monarquía hispana pero que por vaivenes políticos nun pudo materializase hasta 1834 cuando se creen les nueves provincies d’Oviedo y de Santander. Los límites orixinarios d’estes dos provincies sufrieron un cambiu debío a les constantes y series protestes de dellos conceyos allugaos nel valle del Deva, como foi el casu de Tresviso, Ribadedeva y Peñamellera, que reclamaben con insistencia el so deséu de pertenecer a la provincia d’Oviedo, a pesar de la so mayor prosimidá xeográfica cola ciudá santanderina, elexida nueva capital provincial en detrimentu de Laredo, capital hestórica que reclamaba pel so llau los derechos de capitalidá y el tamién nome oficial de la provincia. Asina, los conceyos más occidentales de les Asturies de Santillana sentíense más vinculaos por afinidá cola provincia ovetense que cola nueva provincia santanderina que terminó por axuntar territorios enantes pertenecientes a Palencia y Burgos pa poder facer asina una provincia mayor y de más estensión y pesu económicu. Les protestes poles nueves divisiones provinciales dieron como resultáu que los conceyos de Ribadedeva y Peñamellera pasaren pa la provincia d’Oviedo por un Real Decretu.

Les llendes alministratives tanto civiles como relixoses vienen acutando a lo llargo la hestoria diversos marcos territoriales más o menos estables o precisos y dixebrando sobre'l papel mesmo a valles que poblaciones
Los dominios de los señoríos medievales , eclesiásticos y civiles, foron desllendando y marcando si cabe los ámbitos del ethnos, obligando a la población a enraigonase na tierra, a desplazase a unu o otru centru o capital si quería pleitear o tratar cola Alministración y creando la so hestoria alredor d'unes llendes marcaes polos espacios del dominiu y de la influencia señorial sobre los valles asturianos, acutaos especialmente pola orografía y pola mar, verdaderos marcadores de fronteres nel pasáu, especialmente nos duros meses d’iviernu.

Asina conocíense polo tanto a Les Asturies: había una Asturies d'Uviéu (del ríu Eo al Deva) y una Asturies de Santillana (del ríu Deva al Miera), dixebrada tan sólo polos dominios de la propiedá monástica y por títulos de propiedá y tamién polos pleitos de llendes episcopales ganaos o perdíos por unu o otru obispáu, pero non por ello el pueblu resultó dixebráu continuando si cabe cola so hestoria común, xeografía compartida, mitoloxía, costumes, vezos, llingua o ethnos común: l'ethnos de Les Asturies. Tanto los d’Uviéu, los de la mitra ovetensis, como los de Santillana se consideraben asturianos y como asturianos se dicíen.
Col tiempu l'ambitu del ethnos asturianu va perdiéndo terrén pel Este debío a influencies tanto sureñes como orientales pero inda güei se caltién esti marcu obxetivu y tamién si cabe subxetivu, especialmente nos valles del Deva y Nansa.
Na Alta Edá Media les divisiones alministratives de la corona yeren enforma arbitraries y nun van responder a realidaes xeográfiques o hestóriques consolidaes sinón a conveniencies de tou tipu. Asina les Asturies d'Uviéu formaben una sola unidá alministrativa (nomada en términos oficiales condáu o merindá) llueu d'esgayase de la merindá de Lleón en 1369. Pol contrario, territorios como La Llébana y Pernía (güei norte de Palencia) formaron una sola merindá alministrativa. Otru exemplu de la irracionalidá de les llendes alministratives ye la de la merindá o provincia de Toro que hasta 1803 taba formada por dellos territorios discontinuos y alloñaos ente sí. La organización eclesiástica del territoriu sobreponíase y yera diferente a la civil y tampoco siguía unos parámetros d'estremadures culturales, climátiques o llingúístiques.
Uviéu foi arzobispáu, penriba los obispaos de Lleón y Astorga, recuperando con ello una lexítima aspiración y superioridá hestórica debío al antigu Reinu como sede primada y metropolitana . Les llendes orientales del Obispáu d’Uviéu llegaben hasta San Vicente de la Barquera, nel territoriu políticu de Les Asturies de Santillana, pero per otru llau, La Llébana que pertenecía xeográficamente al teritoriu hestóricu de les Asturies de Santillana anque col derechu de merindá propia debío en gran parte al so peculiar aisllamientu orográficu, formó parte de la diócesis de Lleón y del arcedinazgu de Saldaña, mentantu que Santander hasta que llogró un obispáu propiu dependió como territoriu del obispáu de Burgos dende los pleitos ganaos al d’Uviéu nel sieglu XII.

Nesti sentíu los límites políticos, alministrativos y eclesiásticos foron cambiando col tiempu nun sentíu o notru pero nun hai que confundir estos límites col ámbitu propiu del ethnos que ye’l qu’intentamos desplicar equí, anque sí que puen llegar a condicionalu nun tienen por qué ser equivalentes. Quier ello dicir qu'el fechu de que fuera'l ríu Deva la llende ente les dos Asturies débese a necesidaes referenciales y a los fechos y datos continxentes, como son los títulos de derechos de propiedá monásticos sobre la tierra o la vieya sentencia nel pleitu de la mitra d'Uviéu contra Burgos, y non a fechos dixebradores de la realidá obxetiva y cultural del ethnos. Sólo un mui llargu procesu temporal y una educación o adistramientu de la población pue alterar l'ethnos camudando estos finxos delimitadores orixinariamente arbitrarios y utilitarios en nueves señes d'identidá diferenciada, en fronteres, o inclusu en compartimentos estancos dientro del mesmu ethnos que torguen el so desenrollu evolutivu en pareyo. La propia delimitación del ríu Deva como llinia divisoria imaxinaria de les dos Asturies nun dexa de ser un exemplu de que la hestoria de los pueblos dibuxa ámbitos míticos de referencia espacial pero tamién que la hestoria de los Estaos modernos nun se va establecer precisamente por mediu d’estos marcos míticos, románticos o lliterarios sinón por llinies divisories de departamentos o provincies que a la llarga van dixebrar a los individuos como suxetos alministraos y empobinaos pa dientro d’una o d’otra demarcación territorial milimétricamente prefixada nun mapa. Cualquier visitante que conoza el valle del Deva decataráse qu’esti sonsoneru cursu d’agua pue facer tou tipu d’usos menos el de frontera, puesto qu’esti valle asturianu y llebaniegu ye en si mesmu una unidá indixebrable físicamente. D’ello derívase polo tanto que l’afirmación repetida de qu’Asturies termina nel ríu Deva nun pue ser cierta, ye una media verdá según lo qu’entendamos por Asturies o en tou casu nun ye más qu’una convención imaxinaria yá que nel valle llebaniegu nun s’estremen les orielles o riberes sinón que son más bien los cordales los que marquen les distancies y en tou casu la pertenencia al ámbitu del ethnos asturianu ye clara. Nel casu del territoriu de la Llébana, xugaron más otros factores a la hora de l’adscripción de tol valle a la provincia santanderina como’l factor d’equilibriu o equiparación territorial coles importantes provincies ovetense y bizacína, pa lo que se debió amestar a esta nueva provincia intermedia tierres esgayaes de Burgos, y ello a pesar de la durísima oposición xurdida dende l’ámbitu burgalés. Asina foi cómo se creó la provincia de Santander, unes tierres qu’hestóricamente llucharon siempre por separtase del vieyu dominiu de Burgos, por diferenciase de Castiella y tamién hai que reconocelo siempre ficieron por reclamar una equiparación competencial y una mayor entidá que pudiera equiparales a los privilexos y poderes qu’esfrutaben los sos vecinos territorios del Principáu y de Bizcaya qu’hestóricamente gociaben de fueros y privilexos de Xuntes y goviernos propios. Frutu d’esta tendencia d’esgayase de Burgos foi l’intentu de creación en 1778 d’una provincia de Los Nueve Valles de Asturias de Santillana. Esta provincia d’Asturies de Santillana qu’axuntaba los nueve valles tradicionales del Deva al Miera surdió nun intentu de defender los intereses comunes d’estes tierres amás d’otros de tipu fiscal y social como la persecución del bandolerismu y la delincuencia. Esta agrupación asturiana pretendía reproducir no posible el modelu políticu de les sos poderoses vecines: el Principáu y Bizcaya, qu’esfrutaben dende vieyo d’importantes fueros, ordenances especiales, privilexos fiscales ya instituciones d’autogobiernu a través de les sos Xuntes Xenerales propies. El crecimientu de la ciudá de Santander, la meyora del so puertu col derechu de comerciar con América foron un importante factor tanto pa quita-y a Laredo la capitalidá política como pal surdimientu d’una provincia santanderina. Asina, Santander consiguió llueu un obispáu segregáu del de Burgos y en 1799 el Ministeriu de Facienda crea la provincia marítima de Santander axuntando l’antigu correximientu de les Cuatru Villes y la xurisdicción de Montes de Pas. Esti esgayamientu foi durísimamente retrucáu por Burgos pero tamién por Laredo que reclamaba tanto la capitalidá hestórica como’l nome de la provincia. Ello llevó a la supresión de la provincia marítima de Santander en 1805. Otra importante reforma ilustrada foi la surpesión en 1803 de la governación de Toro que supunxo la incorporación a Palencia de Reinosa y de tol Alto Campoo.

El Principáu d’Asturies cunta dende’l sieglu XIV cola Xunta Xeneral y con importantes fueros, con unes Ordenances o Estatutu propiu, con un goviernu y asamblea representativa y popular, agrupando a los conceyos llibres y a los potentes dominios feudales presentes nel territoriu o merindá de les Asturies d'Uviéu, convertíes honoríficamente en "principáu" por decisión del rei Xuan I de Castiella. La corona castiellana trató siempre d'amenorgar el poder de los estaos feudales o señoriales asturianos lo que orixinó constantes guerres nobiliaries y lluches civiles contra la corona. Pa contrarrestar el gran poder de la nobleza feudal asturiana los reis trataron per un llau de favorecer a la Ilesia y per otru tamién facíen por promover la desvinculación de los valles asturianos de los sos respectivos dominios señoriales. Frutu d'esta política real ye la creación del principáu intentando asina solucionar los conflictos y guerres feudales que marcaron la hestoria medieval de Les Asturies. La política centralista y castellanizante entámase colos Reis Católicos qu'escomiencen un uniformismu políticu y un estatismu relixosu, que se continúa y aumenta colos habsburgu y colos borbones. El Principáu d’Uviéu cuntaba amás dende 1717 con una Real Audiencia d’Asturies, importante institución guvernativa creada ex novo, quizabes nun intentu centralista de suplantar o amenorgar los grandes poderes de la centenaria Xunta Xeneral que yera más bien vista pol absolutismu borbónicu como un parlamentu cuasi democráticu del qu’el poder monárquicu yera recelosu especialmente a partir de los años revolucionarios en Francia. Esti dualismu ente la Xunta y l’Audiencia llegó a xenerar importantes conflicos ente les dos instituciones. Sin embargo, a pesar d’esta importante entidá política que tenía el Principáu, Asturies d’Uviéu nun foi oficialmente considerada legalmente como provincia ministerial hasta 1799 yá qu’anteriormente dependía de la intendencia de Lleón y ello porque hestóricamente Asturies nun podía tener representación nes Cortes de Castiella por tener Xunta Xeneral autónoma, pero la ciudá de Lleón yera de fechu la que representaba como avogada d’Asturies los intereses d’esta nes Cortes castiellanes. La subdelegación ministerial de rentes asturiana tuvo el rangu d’intendencia en 1811 si bien les subdelegaciones formaes en 1799 nes nomaes “provincies marítimes” yeren equivalentes de fechu al restu d’intendencies de Facienda. Con too, la personalidá xurídica diferenciada de les Astureis d’Uviéu siempre tuvo perfectamente estremada y definida. Amás de la Xunta, Uviéu cuntaba con un solu correximientu, amás de tener Real Audiencia propia, muérganu instaláu sólo nos principales territorios hestóricos, vieyos reinos y virreinatos. Asturies tenía tamién un tratamientu censal diferenciáu lo que-y permitió disponer d’una base legal pa tener representación directa nes primeres Cortes o Parlamentos hespañoles. El Bierzu yera naquella época otru correximientu o provincia (igual qu’Asturies d’Uviéu) dependiente de la intendencia de Lleón.

Col tiempu, poco a poco va dir asumiéndose la idea de que Les Asturies d'Uviéu (el "principáu") son simplemente Asturies mentantu que Les Asturies de Santillana van quedando relegaes y esborriaes nun marcu indefiníu que les asocia bien a Castiella y a la so cabeza burgalesa (el “puertu de Castiella” por ser esta tierra perteneciente a la governación de Burgos) , a la realidá física del cordal (La montaña), o como parte del territoriu de la so capital oficial (La provincia de Santander).

La Ilesia de San Salvador d'Uviéu, yera propietaria dende la época de la Monarquía Asturiana de grandes posesiones per Galicia y pal sur rexía los arcedianatos en Babia, Coyanza, Gordón, Benavente y la Ribera del Bernesga. Citaremos por exemplu a otros monasterios asturianos como'l de Santa María de la Vega que poseía la Poladura de la Tercia y Valdescorriel y otres poblaciones alrodiu Benavente.
Depués de la conquista de Toledo y restaurada l'antigua sede episcopal, ésta reclamó tolos obispaos surdíos tres la invasión árabe como heredera de l'anterior primada toledana, a lo que s'opusieron les sedes d'Uviéu y Lleón que se consideraben sedes primades del reinu. So la base d'esto, la Ilesia metropolitana d'Uviéu, la mitra ovetensis, llevó alantre contenciosos hestóricos sobre llendes territoriales colos obispaos de Lugo y Burgos, pleitos que llegó a perder a favor d'éstos. Asina foi cómo Les Asturies de Santillana pasaron a depender del obispáu de Burgos dende l'añu 1184, en perdiendo la mitra ovetense los sos derechos sobre'l monasteriu de Santillana y l'alministración civil tamién tendió a amestar a estes Asturies baxo tribunales y funcionarios burgaleses, entamándose asina la dixebra alministrativa de Les Asturies, anque non la cultural y llinguística pues esti territoriu siguió non sólo calteniendo el so nome sinón que continuó calteniendo en bona midida el nexu de xuntura enraigonáu col ámbitu de Les Asturies. Mentantu pel occidente, anque perdíes otres posesiones creaes o restauraes pola mitra ovetense como Tui, Iria o Braga, la Diócesis d'Uviéu conservó'l territoriu hestóricu asturiense ente los ríos Eo y Navia, As Entrambasauguas, colos grandes arcedianatos de Grandas, Burón y Suarna. Tamién monasterios como'l de Santa María de Vilanova d'Ozcos poseíen en propiedá les sos tierres de Fonsagrada y San Tiso d'Abres.
La documentación medieval asturiana a partir del sieglu X vien axetivando los diversos territorios, valles o villes con alfoz como territorio asturiense , territorio Asturias o como territorio Asturiensium y nel XIII aparecen como terra asturiense, terra de Asturias o Asturias de Oveto. Les definiciones de les llendes oriental y occidental de los territorios, veigas o valles son abondo imprecisos mentantu que la llende sur de los mesmos preséntase claramente desllendada pola llinia dixebradora d'agues y llinies de cumes o cimbros.
Asina, pertenecen a les Asturies occidentales ente otros, la Ripa de Eube, territorio Ripa de Ove, (esto ye, la ría del Eo y el territoriu o valle oriental de la ría del Eo), el territorio Navie (el valle enteru del ríu Navia), el territorio Gandaras o Terra Sancti Salvatoris de Gandras, la Terra de Tinegio de Lectaregos usque in illa aqua de Navia. Nel oriente (y perdíos pola mitra d'Uviéu los territorios de Santillana), los documentos medievales mencionen a Cabrales, ensin concretar más los términos d'esta tierra. Notros documentos asturianos son frecuentes les menciones a otros territorios al sur de la Cordalera Asturiana como por exemplu Babia, L.laciana, Lluna, Oumaña, Alba, Gordón, Argüellos, Valdeparedes, Bierzu, zones d'importantes dominios asturianos tanto eclesiásticos como nobiliarios.
L'ámbitu de l'alministración eclesiástica de la Diócesis d'Uviéu, el territoriu de la mitra ovetensis, incluyía los grandes arciprestazgos de Burón, Navia de Suarna, Grandas de Salime (valle medio del Navia-Eo, tierras de Fonsagrada y Negueira) que poseyó hasta l'añu 1945 perdiendo dalgunos territorios dende esta fecha. Foron precisamente los ámbitos eclesiásticos los qu'inspiraron en gran parte les futures divisiones alministratives civiles, como foi el casu de Les Asturies de Santillana qu'eclesiásticamente dexaron de pertenecer a Uviéu pa depender de la mitra burgalesa, pero que en creándose l'obispáu de Santander volvió ésti a depender del Arzobispáu d'Uviéu, xunto colos de Lleón y Astorga.
Hai que remembrar que nel Conceyu cellebráu n'Uviéu en 1115, baxo la presidencia del obispu Pelayu, consideráu como una de les primeres xuntes xenerales d'Asturies, asistieron ente otros representantes de los territorios asturianos de Gordón, Argüello, Alba, L.laciana, Babia, Lluna, Oumaña, Lleón, Astorga, Asturies de Santillana, Camargu, Trasmiera ya Iguña. Uviéu foi capital eclesiástica durante tol períodu del reinu asturlleonés hasta la conquista de Toledo que reclamó l'antigua capitalidá visigótica, orixen dende entós de sucesivos pleitos territoriales.


La cartografía de la costa asturiana tuvo siempre bastante bien afitada asina como les llendes costeres del territoriu de les Asturies d'Uviéu yá que la cartografía marítima por norma yera la más fácilmente estudiable y más conocida por elementales necesidaes del tráficu marinu y de la defensa naval mentantu que pel interior la imprecisión a la hora d’allugar les poblaciones ye mayor. La cartografía va meyorando col tiempu y faciéndose cada vez más científica, pero una vez más hai que recordar una constante hestórica repetida y afitada nos mapes: el límite ente Asturies y Galicia ye siempre el cursu enteru del ríu Eo y el límite asturianu con Castiella son los puertos que dixebren les agües al norte y la Meseta. Como quedó reseñao, nun podemos falar de determinismu ente les llendes alministratives y les llendes del ethnos pero sí de ciertu influxu, especialmente cuando les primeres se caltienen durante un llongu periodu de tiempu onde los ámbitos políticos o alministrativos asimilaos puen xugar un rol significativu na consolidación del propiu ethnos. Esto ye, un individu que nun perteneza al ethnos nel que ta inscritu pue llegar a pertenecer a él, non yá alministrativamente sinón col pasu del tiempu mediante procesos d'asimilación gradual.
Les víes de comunicación tamién xueguen modernamente un papel perimportante nos vínculos de pertenencia grupal, axuntando o separtando voluntaes. Asina suel dicise güei qu'el deséu de vinculación al ethnos asturianu (en sentíu subxetivu) de la población de Sayambre ye mayor qu'el de la población de Valdeón pol simple fechu de la esitencia o non d'una carretera d'accesu al valle baxu. Modernamente, la radio y la televisión cumplen funciones societaries de vinculación grupal tan fuertes o más que les víes de comunicación terrestre (carreteres o ferrocarriles).
Hestóricamente, la organización alministrativa civil del territoriu peninsular de la corona hespañola nun respondía a criterios de racionalidá organizativa. Los límites alministrativos sirvíen simplemente p'acutar les competencies de cada Audiencia o tribunal, y especialmente p’acutar el campu de trabayu de los recaldadores del ministeriu de Facienda. Pero paralelamente esistíen llendes hestóriques ente los vieyos reinos y ente ámbitos de cultura condicionaos pola orografía y poles vertientes de ríos y valles como llendes físiques y naturales.

La implantación n’Hespaña del nuevu estáu constitucionalista d’inspiración francesa va traer la necesidá de refacer tol mapa alministrativu del estáu, intentando terminar col modelu d’estáu propiu del antigu réxime absolutista. Asina, la Constitución hespañola de 1812 suprime les xurisdicciones señoriales y eclesiástiques que distorsionaben la racionalidá igualitaria de los mapes al atopase escesivamente descompensaos n’estensión y nalgunos casos relativamente dispersos.
El trunfu del estáu lliberal centralista hespañol trai la necesidá d'iguar uniformemente l'alministración del territoriu a imitación del modelu republicanu francés: dividir el territoriu en 50 unidaes territoriales equivalentes (nomaes nun principiu governaciones o provincies) en sentíu departamental ya igualitarista, esto ye, toles provincies habríen tener el mesmu rangu y les mesmes atribuciones ya instituciones subordinaes al poder central y a ser posible, tamién una similar estensión y pesu económicu.

Dende la idea de crear les provincies marítimes a principios del XIX, esgayando asina territorios de costa respecto a la dependencia del interior y potenciar asina les poblaciones portuaries costeres que xeneraben importantes ingresos d’aduana marítima, hasta la definitiva creación del mapa alministrativu del estáu, hai un constante procesu de reformes y contrareformes que se van concretar en 1834 nel nuevu mapa provincial. Les nueves provincies, creaes por real decretu en 1833 , llevaríen el nome de la so ciudá capital onde l'estáu axuntaría de manera centralizada les sos oficines o delegaciones ministeriales y otros servicios públicos: un tribunal, gobernador civil, sudelegáu de Fomentu y Diputación provincial. Sin embargo, la división alministrativa del nuevu estáu lliberal hespañol foi el resultáu d’un llergu y dilatáu procesu d’ensayos y d’esperimentos de reordenación territorial que duró unos 24 años, debío tamién a la constante inestabilidá institucional y al imprevisible vaivén políticu motiváu poles lluches ente partidarios y detractores d’un o d’otru modelu d’estáu pa Hespaña.


- En 1778 , nel antigu réxime, surde una agrupación nos nueve valles asturianos del Deva al Miera como “provincia d’Asturies de Santillana” pa reivindicar intereses comunes.
- En 1799 créase la subdelegación de rentes del Ministeriu de Facienda nes nomaes “provincies marítimes” d’Alicante, Asturies d’Uviéu, Cádiz, Cartaxena, Málaga y Santander.
- En 1805 suprímese la provincia marítima de Santander pola oposición de Laredo y Burgos.
- En 1810 el goviernu usurpador y títere de Xosé Bonaparte decreta una nomada “división prefectural” diseñada pol matemáticu José de Lanz. Les nueves “prefectures” facíen tabla rasa o dameru a la manera napoleónica francesa suprimiendo les divisiones hestóriques del antigu réxime por otros departamentos o “prefectures” que llevaríen nomes d’accidentes xeográficos, ríos o cabos y suprimiendo los nomes hestóricos de los territorios. Asturies d’Uviéu camúdase asina en “Prefectura de Cabo de Peñas”(sic) y llega hasta Navia, onde entama la “Prefectura de Alto Miño” (sic) que por tener menos costa toma asina parte de la d’Asturies pa compensar. Astorga ponse como capital de “Prefectura de Esla”, ciudá un tanto alloñada d’esti ríu. Inténtase asina borrar del mapa por decretu a los nomes hestóricos d’Asturies, de Galicia y del teritoriu de Lleón.
- En 1811 la subdelegación asturiana de Facienda adquier el rangu d’intendencia esgayándose oficialmente de la de Lleón.
- En 1812, la nueva Constitución establez que se fairá una división más conveniente del territoriu por una llei cuando les circunstancies lo permitan. Define a Asturies y a Galicia como provincies constitucionales con derechu asina a representación parlamentaria propia. Burgos algama tol territoriu d’Asturies de Santillana yá que l’esgayamientu santanderín nun va llegar hasta la segunda etapa constitucional.
- En 1813 encárgase al marinu Felip Bauzá el diseñu provincial. Propón dos tipos de provincies o governaciones, superiores y subalternes, de manera xerárquica. (Les subalternes tendríen sólo xefe políticu y les superiores Diputación y representación parlamentaria). Astorga ye provincia subalterna y Lleón amplíase hacia l’este como provincia superior. Reinosa y Alto Campoo pertenecen a Burgos. Esti proyectu nun llegó a discutise nes Cortes debío a la involución absolutista de Fernando VII.
- En 1821 vuelve discutise un nuevu proyectu de Felip Bauzá y José Larramendi basáu nel anterior.
Una comisión parlamentaria vuelve revisar el proyectu. Ésti tampoco respeta los límites hestóricos d’Asturies, a pesar qu’incluye na provincia d’Asturias los territorios hasta la mesma oriella o ribera del ríu Deva onde según diz el proyectu “parez que la naturaleza terminó el principado” (sic), lo cierto ye qu’estos conceyos del Deva solicitaron con reiteración non pertenecer a la provincia de Santander y sí a la provincia asturiana. Pel otru llau, el proyectu Bauzá-Larramendi segrega los territorios del interior al Este del Eo y valle altu del Navia (Fonsagrada, Suarna) pa la provincia de Lugo inventando asina una nueva frontera non hestórica y dando asina contentu al espansionismu sobre Asturies de dalgunos diputaos gallegos qu’aspiraben a esgaya-y al Principáu más tierres asturianes. Otra de les noveades del plan Bauzá-Larramendi ye la creación de la provincia d’El Bierzu a la que s’amesta Valdeorras. L’esgayamientu de les tierres de Burón y del Altu Navia de la so hestórica pertenencia asturiana motivó una notable confrontación ente diputaos gallegos y asturianos. La idea subyacente de les divisiones reflexa un intentu de facer un equilibriu ente les provincies evitando no posible tanto les provincies demasiao grandes como les escesívamente reducíes tanto n’estensión como en población con una idea presente de la provincia como pieza electoral a la hora de l’asignación igualitaria de diputaos pa cada una d’elles, ehí el procuru en facer divisiones asemeyaes n’estensión per un llau y les compensaciones o estiramientos d’unes provincies frente al territoriu d’otres pa llograr esi equilibriu. Recordemos qu’el territoriu lucense yá yera daquella unu de los menos poblaos especialmente frente a los sos territorios vecinos como Asturies, que cuntaben con una muncho mayor población. L’influyente Conde de Torenu presentó una proposición favorable al caltenimientu de la raya divisoria hestórica nel cursu enteru del ríu Eo y diez diputaos gallegos retrucaron la so propuesta, el Conde alegó que los habitantes d’esta zona habríen atravesar montañes intransitables pa desplazase a Lugo y que la segregación d’estes tierres yera contraria al sentir popular. Juan Osorio, diputáu gallegu propuso una solución salomónica, transaccional y de repartu del ríu: respetaríase la llinia divisoria tradicional del ríu Eo sólo hasta’l conceyu d’Abres, pasando’l restu del cursu del ríu, con too Burón y La Pobra de Navia de Suarna pa la provincia de Lugo, alegando “una mayor relación comercial d’estos pueblos cola ciudá de Lugo que cola d’Uviéu”(sic). El xixonés Juan Fernández San Miguel rechazó esti repartu intermediu afirmando que la frontera sólo podía ser el ríu yá que nestes Entrambasagües asturianes nun había más división natural qu’el ríu, siendo por ello ineficaz dixebrar los valles en sentíu trasversal y calificando como artificial esta propuesta de división provincial intermedia. Esta división transaccional foi l’aprobada poles Cortes en xineru de 1822 : Fonsagrada, Negueira y Suarna pasen asina pa la provincia de Lugo. Lo que nun pudo salvar Asturies siquiera foi el so propiu nome hestóricu, a pesar de les quexes de los diputaos asturianos y del propiu Juan Fernández San Miguel la nueva unidá alministrativa llevaría el nome de “Provincia de Oviedo”(sic).
- En 1823 Fernando VII deroga tola obra constitucional tornando l’estáu al antigu réxime absolutista. La función de les provincies como demarcaciones electorales queda asina suprimía y tol ordenamientu derogáu. Pero yá en 1825 volvió trabyase nuna reforma más ambiciosa qu’esta vegada dividía l’estáu en cuatro niveles alministrativos: audiencies, provincies, partíos xudiciales y municipios. Na nueva comisión figuraben Larramendi y Fernández Navarrete. El proyectu suprimía la provincia d’El Bierzu debío a los reducío de la so estensión. Nesti casu la división provincial ye un instrumentu al serviciu básicamente de l’alministración de xusticia y de la competencia de los tribunales. Esíxense polo tanto unos requisitos mínimos de población pa los partíos xudiciales, repartiendo asina igualitariamente el trabayu de los xueces y funcionarios. Los trabayos de delimitar tolos nuevos partíos xudiciales y municipios llevaron munchu tiempu y nun se terminaron hasta depués de la muerte del rei. N’algamando el lleonés Javier de Burgos el Ministeriu de Fomento yá los trabayos taben terminaos asina que la nueva planta provincial aprobóse por decretu el 30 de Payares de 1834. Les modificaciones esta vegada foron la incorporación de Peñamellera y Ribadedeva a la provincia ovetense tal y como se venía baraxando años atrás poles demandes nesti sentíu pero non los teritorios de Tresviso o Llébana que pasaron a ser de Santander.L’Audiencia d’Uviéu tamién reivindicó estes incorporaciones. Tampoco esta vegada respetóse el nome d’Asturies.: el goviernu de Madrid nun atendió a les constantes encamientos y reclamaciones formales feches pola Xunta Xeneral del Principáu nel sentíu de que se caltuviera el nome d’Asturies no que se considera foi l’últimu actu heróicu y desesperáu como cabeiru actu de voluntá d’esta centanaria institución asturiana d’autogobiernu soberanu que veía el fin de los sos díes, suprimida y suplantada mediante decretu por un ente alminstrativu que se dio como nome “Excelentísima Diputación Provincial de Oviedo” que escomenzó la so esistencia un 8 d’Avientu de 1835.
- En 1842 vuelve formase un nuevu plan de división territorial ultimáu por Fermín Caballero nel que vuelve aparecer la provincia d’El Bierzu incluyendo a Valdeorras. Otres novedaes son la quinta provincia gallega de Santiago, esgayada de Coruña y parte de la de Pontevedra y la retrocesión de Reinosa-Alto Campoo pa la provincia de Pisuerga (Palencia). Propónse amestar a la provincia de Montaña los conceyos asturianos del Deva anteriormente agregaos a Uviéu que se prevee cambie el nome pol de provincia de Nalón. El norte de Burgos améstase a la provincia de Montaña. El Bierzu y lleón formaríen parte de l’Audiencia y distritu militar d’Asturies (esta vez sí yera esta la denominación). Suprimíense los obispaos de Mondoñéu y Astorga y fairíase por coincidir no posible los obispaos coles provincies, sometiendo asina el poder eclesial al orde civil. El términu “Cantabria” aplícase al territoriu de l’Audiencia de Pamplona formada por Navarra, Vascongaes y Logroño (recordemos que nun esistía entós el términu “Euscadi”) y yá hai constancia anterior de qu’el términu Cantabria designaba a Vascongaes y a las montañas de Burgos. :’accesu al poder de los moderaos impidió l’aplicación d’esti plan.

Asina foi cómo la división provincial de 1834 fecha en tiempos del ministru Javier de Burgos foi la que pervivió hasta los tiempos actuales. Nel casu d’Asturies, les élites polítiques y sociales del momentu llucharon tanto por reconocer la personalidá y el nome d’Asturies como por caltener por tolos medios posibles al so alcance el terrotriu hestóricu completu del País Asturianu dende’l ríu Eo al valle del Deva contra tou tipu de proyectos antihestóricos y artificiales que trataben de recortar el so ámbitu lexítimu y hestóricu. La organización provincial del Estáu, anguañu superada pola organización autonómica del mesmu, foi resultáu tanto de les tendencies racionalistes y uniformadores del Estáu lliberal centralista como de la voluntá d’afirmación hestórica de les sociedaes perifériques.

Asina surde el 8 d'Avientu de 1835 la nueva Diputación Provincial d’Oviedo non ensin gran polémica y protestes de la centenaria Xunta Xeneral d'Asturies qu'exercía les funciones representatives y de goviernu autónomu nel país, quedando suprimida ésta dende esi momentu y arrincáu el so hestóricu llabor. El 8 d'Avientu de 1835, Asturies pierde los sos hestóricos Fueros y Derechos.
L'Estatutu d'Autonomía p'Asturies de 1981 establecerá que les llendes de la nueva Comunidá Autónoma se correspuenderán coles mesmes del territoriu alministrativu de l'anterior provincia d'Oviedo dibuxada en 1833. La Xunta Xeneral aprueba una llei que permite el cambiu del nome de la provincia qu’oficialmente se nomará d’Asturies.

En términos del ethnos asturianu que tratamos ¿correspuéndese l’ambitu d’ésti col ámbitu del territoriu alministrativu de l'anterior provincia ovetense?. De xuro non, polo que anguaño ye más que necesario establecer cuálos son los ámbitos esactos del ethnos asturianu actual. Y pa conocer esti espaciu nun habrá más qu'especificar el marcu de lo que conocemos güei como la nación, nacionalidá o país asturianu.





Ámbitu actual del ethnos asturianu



1.- Pal Norte: la mar.

La mar más que como llende como espaciu abiertu al Norte, como ablugu defensivu y como elementu configurador del ethnos de primer magnitú. La mar al Norte determina un clima especial y un carácter, ya igual que notros países con mar al Norte como Holanda, Alemaña o Polonia, marca con un xeitu específicu a la tierra y a la población. D'esta mar provién toa una cultura marinera propia y una forma de vida. D'esta mar de bravén lleguen les boriaes, el nordés, la borrina y el mal tiempu en xeneral. D'esta mar salíen los emigrantes de la tierra hasta hai décades. Una mar al Norte que se ve más con respetu que con medrana, la mar que va del cabu Burela a Bretaña: esta mar ye'l Golfu de Gascuña, la Bahía de Bizcaya, el Mar Cantábricu, la Mar Astúrica.





2- Pal Sur: la Cordalera Asturiana y la vertiente o divisoria d'agües.

Los IUGA ASTURUM na dómina romana o Los Montes Asturianos na Edá Media nun dixebraron al ethnos na so configuración y desenrollu pero güei formen la médula espinal que desllenda hestórica y climáticamente a Les Asturies pel sur, dixebrando los ríos que van al mar pal norte de los que van pal Dueru y axuntándo les tierres cola parte qu'hestóricamente ye de Lleón, esto ye, lleonesa, y cola parte que ye palentina, esto ye, castiellana. Dende la Serra d'Ancares, Valouta y el cume Miravalles hasta'l Picu Tres Mares na Sierra de Peña Labra hai una llinia trazada, una llinia que pasa per Penaubiña, Peña'l Vientu, Pontón, Gildar, Pandetrabe, San Glorio, Peñaprieta y Picu Pumar, una llinia que xunta los cumes y puertos más altos y que conformen una raya celestial, intrazable, inalgamable ya incincable: asina ye la frontera de Les Asturies.






3- Pal Oeste: el cursu enteru del ríu Eo.

Son parte hestórica d'Asturies la Ripa de Eube, el territorio de la Ripa de Ove, el territorio Navie (el valle enteru del Navia), el territorio Gandras (cursu mediu ente l'Eo y Navia),Oscos, Riparia, y Semellón, según documentos medievales posteriores al reinu d'Asturies. Pero la vinculación d'estos territorios o valles a Asturies va venir más bien por mor de les posesiones eclesiástiques y confirmáu por certificaciones reales, en concretu d'Alfonsu VII qu'oficialmente otorgó en propiedá a la mitra ovetense y pa la so alministración esti territoriu en ente'l cursu de los ríos Eo y Navia. Hasta l'añu 1954 pertenecen a la Diócesis arzobispal d'Uviéu los grandes arciprestazgos de Navia de Suarna, Burón y Grandas de Salime (incluyendo las Terras de Fonsagrada y Negueira) y los cartógrafos antiguos asina lo amuesen como parte civil integrante de les Asturies occidentales. Pero la inclusión nel marcu del ethnos requier dellos datos más que los de les llendes polítiques. Estos datos vienen daos pola presencia d'arquitectura popular asturiana, pola hestoria, pol elementu llingüísticu común al restu del Navia-Eo, esto ye, la llingua galaicoasturiana, y tamién pol elementu xeográficu y de vertiente. El territoriu del valle del Altu Navia configura una xuntura xeográfica y cultural a la que pertenecen los valles de Valouta, Ibias, Lamas, Suarna y por supuesto Negueira de Muñiz, conceyu esti esgayáu de Fonsagrada qu'ocupa les dos riberes del Navia nel so cursu mediu y la del ríu Ibias nel so cursu baxu. Dientro los elementos conformadores del ethnos amás del galaicoasturianu destaca unu sobremanera: a partir d'estos territorios y hacia l'este preséntasenos l'ambitu esclusivu de les construcciones nomaes de teitu de paya, presentes sólo dende l'Altu Navia y Ancares hasta Cabrales como un elementu más del ethnos característicu y peculiar. Les agües al Cantábricu y l'elementu montañosu al este del ríu Eo configuren un paisaxe nel que s'asocia la idea de Les Asturies cola montaña y colos pequeños valles del Navia y del este del Eo, mentantu que la idea física de Galicia asóciase a la tierra llano, a les tierres y agues del Miño. Siendo l'Eo un espaciu de llende idiomática, xeográfica y hestórica nuna zona especialmente permeable y periférica del ethnos como lo ye ésta nun hai más referencies delimitadores que les que nos permitan afirmar la plena presencia hestórica del ethnos d'Asturies nes tierres de Ripa de Ove, Grandas, Oscos, Fonsagrada, Negueira, Burón, Navia de Suarna y Valouta.
Buscar llendes xeográfiques más precises como la serra de Pedruñales, la do Pozo, el Monte Restelo o la del Portelo onde curiosamente s'atopa un significativu topónimu del tipu "Pedrafita", sólo valdría pa desllindar los ámbitos xeográficos de les tierres de Cervantes y del Miño de les del Altu valle del Navia, Suarna y Fonsagrada, dándo-y al elementu xeográficu un valor de marcu o más simbólicu si cabe nesta función de concretar los ámbitos referenciales.





4- Pal Este: los montes que delimiten el valle del Nansa.

Anque los elementos del ethnos asturianu esperimentaron una regresión pel este, non sólo de tipu llingüísticu sinón d'otros munchos elementos sociales, de colonización, diglosia llinguística y minoración cultural, la presencia del mesmu ye apreciable especialmente nos valles del Deva y Nansa. Anque como ocurre cola llende occidental del ethnos esti ámbitu oriental ye tamién permeable y abiertu a influencies etnográfiques y a desenrollos paralelos. Hestóricamente Asturies son dos entidaes eclesiástiques: una, la Asturia d'Uviéu y la otra, la Asturia de Santillana, que xuntes formen el plural romance de Les Asturies. Si la presencia d'horros ye güei discutible en Ribadedeba o Peñamellera Baja pol despoblamientu y la industrialización (conceyos que pasaron por decretu de Les Asturies de Santillana a la nueva provincia d'Oviedo) notres zones como valles de Peñarrubia o La Llébana la bayura constructiva y etnográfica caltiénse y ye un elementu más del ethnos común, lo mesmo que la gran diversidá de monteres, (ente elles la picona), los topónimos romances, la gastronomía, la llingua, el folclore, la mitoloxía y otros munchos elementos más, hestóricos y actuales, d'esti ethnos propiu de Les Asturies que siguen presentes na conciencia colectiva. La llende fatídica del valle del Nansa, últimu valle oriental onde se manifiesta claramente l'elementu que tratamos, sigue una llinia de cumales y cordales que casualmente coincide colos límites conceyiles dende les marismes del Val de San Vicente y que van marcando el Picu Gándara, el Matamigüela, el Guariza, el Caorra y que termina, cómo non, nel Picu Tres Mares, que mira nas alturas dende lloñe a les fontes del Ebru, y a les más averaes del Pisuerga y Nansa.






Caberes consideraciones sobre los ámbitos del ethnos.


Los desllindes espaciales del ethnos o nación humana son sólo un instrumentu identificativu más qu'estrema de forma arbitraria o artificial a tol conxuntu simbólicu d'elementos qu'integren el ethnos, intentando da-yos asina una xuntura que se simboliza nel espaciu físicu delimitáu.


L'acutamientu teritorial del ethnos nun ye polo tanto un esfuerzu vanu, sirve pa facilitar la identificación del mesmu tanto interna como esternamente frente a otros ámbitos y esclaria la pertenencia de los individuos al territoriu colectivu y mui significativamente nel ámbitu más periféricu del ethnos. Esti territoriu sobrepuestu amuésasenos como un elementu visual y definitoriu más a los otros munchos rasgos diferenciadores que conformen el conxuntu de los caracteres nacionales.
El territoriu del ethnos sirve tamién como marcu d'actuación dientro d'él y de manera práctica como un cinchu de seguranza de la propia entidá colectiva y hestórica qu'axunta. Nun se pue escaecer como exemplu qu'el marcu o silueta recortada del territoriu del ethnos munches veces fai les funciones de símbolu identitariu y de seña identificadora del ethnos al que representa.


Modernamente usóse y abusóse del conceptu d'ethnos o nación instrumentalizando ésti a favor del conceptu d'Estáu. El nacimientu de los estaos lliberales modernos dende principios del XIX conllevó l'adopción d'un modelu únicu o uniformador pal ethnos en sentíu esclusivista que sirviría de soporte material y de lexitimación pal estáu. Los estaos delimitaron asina unes coordenaes prefixaes como conformadores d'un ethnos esclusivu (un ethnos estatalizante), politizando destamiente'l términu y estremando ente los conceptos de "nacional" y "estranxeru", lo que sirvía más que al ethnos a los propios intereses de los estaos. La nación identificase entós col estáu, en sentíu lliberal y centralizador, asociando esta pallabra de manera interesada coles idees burgueses de llibertá ya igualdá.
El Romanticismu alemán va idealizar el conceptu de nación (VOLK), afitáu por Hegel y Marx, y ésta camúdase nun fin en si mesma, con unes coordenaes más síquiques que físiques, identificándola con una entidá abstracta, mística y polo tanto non entendible en términos de racionalismu o empirismu. Sin embargo dambos términos vuelven separtase en comprobándose la esistencia de naciones ensin estáu, d'estaos ensin nación y d'estaos plurinacionales. El conceptu d'estáu evoluciona y l'antigua equiparación lliberal d'estáu-nación pierde sentíu y fuerza.
Actualmente, el conceptu de nación-estáu vien manifestando una continuada perda de valor. En primer llugar polos procesos d'integración internacional o supranacional y pola mayor xuntura económica y política, onde'l conceptu de "estranxeru" o "non-nacional" va perdiendo sentíu y efectividá. En pareyo hai una afirmación de les naciones ensin estáu pero non en sentíu estatalista sinón en sentíu asociativu con otres naciones afines. Esti ye'l casu por exemplu de les naciones indíxenes d'América, del paneslavismu, del panarabismu o de la nomada Europa de los Pueblos o de les naciones del Arcu Atlánticu. Estes corrientes vienen a frayar colos típicos esquemes tanto del estatismu que ñega les naciones como del nacionalismu clásicu que quier algamar un estáu propiu.
Nesti sentíu, el conceptu de nación avérase cada vez más al conceptu de "partria" y allóñase siacasu del clásicu conceptu d'estáu por atopase ésti en constantes procesos difusos d'evolución y cambiu.
Cuando nos referimos al ethnos asturianu como patria, aludimos non yá a una idea obxetiva o material sinón más bien síquica, esto ye, sentimental, afectiva o anímica del individu. Destamiente la patria avérase más bien al conceptu de nación en sentíu idealizáu y non yá al conceptu d'estáu. Dicho d'otra manera, la nación entiéndese cada vez más quizabes en sentíu afectivu como patria y non yá como entidá política independiente, o como estáu soberanu.


Nel casu d'Asturies, esta realidá obxetiva anguañu nun podemos dicir que constituya una nación ensin estáu yá qu'en realidá preséntasenos como una nación con "dalgo" d'estáu, anque de manera más o menos desdibuxada. El problema d'Asturies nun paez ser l'algamar mayores formes d'estáu (factor principal de tou nacionalismu) sinón que impedíes les víes estatistes lo que se busca ye más bien asegurar les sos bases como nación. Una d'estes bases o elementos, como quedó desplicao, ye'l reaxuntamientu físicu dientro del so ethnos, l'afitamientu del so espaciu o ámbitu territorial que conforma l'ámbitu obxetivu y hestóricu del país asturianu.

El fechu de que l'ámbitu espacial del ethnos asturianu nun coincida coles llendes alministratives o provinciales actuales nun significa que se tengan qu'asimilar éstes como l'únicu marcu posible de referencia pal ethnos.
Nesta llinia, hai que reconocer que cualisquier estudiu o visión rigurosa y seria que se vaya facer en xeneral sobre dalgún campu del ethnos asturianu como por exemplu la hestoria, xeografía, economía, fauna, arte, arquitectura, folclore, gastronomía,... o cultura "asturiana" o "d'Asturies", nun podrá nunca restrinxise nin referise sólo al espaciu físicu marcáu poles llendes alministratives de 1833 sinón que habrá a abarcar en xustos términos l'ámbitu enteru del ethnos asturianu, esto ye, l'espaciu y el marcu real de la nación asturiana.

Destamiente confírmase que l'elementu territorial o espacial del ethnos, amás de ser un elementu configurador ye básicamente un instrumentu prácticu de conocimientu del ethnos, intentando abarcálu na so xusta estensión y polo tanto amuésandolu con mayor precisión y fondura, faciendo asina por comprender y analizar toes y caúna de les manifestaciones y elementos integrantes del ethnos, de manera completa, ensin escluír nengunu y pa llograr tamién una visión esacta y axeitada de la so más xenuína esencia y configuración.