Dellos grupos sociales de Llanes

[Ramón Sordo Sotres]

DELLOS GRUPOS SOCIALES DE LLANES

Miles y miles de llaniscos vivieren y trabayaren a lo llargu los siglos nos pueblos, caserías y villa que se reblagan per tou el conceyu, mucha xente, hombres, muyeres, críos, rapazos, mozos, vieyos... esas presonas axuntábanse en grupos según los llabores que jacían. Había muchos d'ellos pero los más nombraos puen ser estos:
1) El que tien una tienda o trabaya n'ella y asina la xente del campu o de la Villa podía comprar cosas que no tenía. Esa tienda taba nel pueblu, na Villa... o n'América:
Estudiaos o no en Comerciu (con cursos qu'eran más bien elementales), los más de los indianos de Llanes trabayaban en tiendas de Cuba o Méjico (y a veces durmían tamién n'ella), dellos d'esos indianos cuando güelven abren una tienda nel so conceyu y siguen equí el llabor d'América.
Tamién mandaban perras dende América pa obras públicas, grandes o chicas: escuelas, carreteras, juentes, llavaderos... o, n'España, jablaban colos que gobernaban pa qu'estos las jacieran.
2) Los que curian la salú de tos, como son el ciruxanu (o médicu) que visitaba a la xente y salvaba vidas na villa o nos muchos pueblos y caserías del conceyu onde diba, ¡claru!, andando o a caballu.
3) Los pastores que tienen vacas, reciella y caballerías nos montes grandes del conceyu: El Traviesu, La Mardola, El Texéu, Llabres, Benzúa, el Ríu Nueva... eran y tovía son los que conocen vegas, cuetos, picas, canales, cuevas, garmas, jaedos... dában-yos nombres y asina salieren tolos miles topónimos del municipiu, muchos d'esos llamatos entovía tán sin pasar a los papeles.
4) La muyer del teyeru que un, dos, tres o más meses del añu curiaba ella sola de los críos y de los más vieyos de la familia pero, amás, jacía los muchos llabores d'ella y del hombre que no taba en casa; ayudábanla otros de la familia y los jelecheros (qu'eran los que no diban a la teyera).
5) Las familias de colonos que vivían en dellas caserías del poniente del conceyu de Llanes y llevaban la posesión del amu que vivía, siempre, nun llugar más grande. Asina la xente conoció más sitios de las erías y del monte y nacieren o se caltuvieren muchos más topónimos. Otros hombres y muyeres qu'eran nacíos d'esi poniente de Llanes joren colonos en pueblos de Val de San Vicente y otros municipios de Cantabria.
6) Los fedatarios y las presonas privadas que daban forma llegal escrita a la vida económica del conceyu: cotos, herencias, xuicios, ventas, deudas... Y, viendo el mundiu con otros oyos, hebo hombres y muyeres qu'escrebían de muchos otros asuntos nel modu parllar de la tierra o na lluenga de Castilla. Esos escribanos, esos particulares, esos escritores y la memoria de los antiguos son los que mos cuntan cómo era Llanes.

Ramón