Redondas cuadradas

[Ramón Sordo Sotres]

REDONDAS CUADRADAS

Esto que si nel monte o na ería cae barru o tierra, en muchos conceyos a eso lláman-y un argayu pero nel pueblu cabraliegu de Bulnes, que ta ente el puertu, el ríu, la peñe, los montes y los picos, si lo que baxa son piedras entós e una quebrada pero si e namás una la que cae o son más pero tán más sueltas, nombran un lisu, con ele no con elle porque la pallabra, onomatopéyica, debe vinir de lo mesmu que la castellana deslizar.

Cuando la piedra allega al suelu y queda sola, estóncenes sigue llamándose una piedra, si e chica, pero pasa a ser una redonda si e más grande, que las más d'estas son cuadradas, prismáticas dichu en finu pero el nombre d'ellas e esi, redondas, que hai bien d'ellas na toponimia, un suponer la Redonda los Llacios en Sotres o la Redonda l'Argada, la Redonda los Cazadores y La Redondona en Bulnes.

Dixerénmilo asina y asina cúntolo yo agora.

Ramón