De Pimiango pa la mar

[Ramón Sordo Sotres]

DE PIMIANGO PA LA MAR

   Ello que los valles que tán ente los ríos Sella (~ Seya) y Deva tienen un relieve mui enredosu qu’una y otra vez sigui dándomos sorpresas que prestan. El de la orilla la mar vien a ser tan nombráu como el del monte, como vamos ver agora.
  Pimiango, el pueblu que ta más al norte del conceju Ribadeva, llámame l’atención porque d’elli bájase a lo menos por cinco cuestas pendias jasta la mar, dempués de perder unos 150 metros de desnivel. Estas bajadas, polas que pue dir un montañeru corriente (o podía dir, porque la númeru 2 ta agora mui mal), son, del poniente al saliente:
  1- A la Braña Bendía pola Cuesta Bendía, qu’e la que quemó esti miércores 23 d'agostu sin que nel papel ponieran, que yo sepa, el topónimu como lu llaman los de Pimiango.
  2- A El Dentón por las Cuevas Colorás. L’arenal d’El Dentón ajúntase col de Bendía a mar baja. Sin embargu, ya va unos años qu’el senderu pa bajar ta mui esgonciáu por baju de las Cuevas Colorás.
 3- Por La Robla a El Joyu los Cebes, onde hai playa anque namás cuando baja la marea; pero ello tien que ser más que jartu, no solu un poquitín.
 4- De La Granja por cerca d’El Torcón a La Lanchuca (que no sé si el topónimu e La Lanchuca o La Lastrona). Con arena tamién pero pasa como nel Joyu los Cebes, porque debe ser un día mui mui aparente pa ello.
 5- D’El Picu y Tronía a El Regolgueru, arenal nombráu por ser la playa última d’Asturias si no cuntamos las que tán a la orilla del Ríu Deva.
   Quisi escribir esta carta na jabla del conceju onde ta Pimiango (o Pimiangu, como tamié sintí a daque vecina del pueblu). ¡En cada patria su jusu! 

   Ramón