Una grabación que no pudió ser

[Ramón Sordo Sotres]

UNA GRABACIÓN QUE NO PUDIÓ SER 

  Leoncia Campillo Martínez y Cirilo Sánchez Sadia, de Bulnes ella y de Caín elli, vivían en Benia, la capital del conceyu d’Onís. Pelos veranos diban a Ariu, la vega más alta con pastores de las muchas del Puertu Onís, onde criaban a no sé si siete, ocho o nueve jiyos.
  Llevaban el refuxu de la mayada y, amás, Cirilo jacía de práticu pa muchos montañeros (o turistas, como-yos llaman nesos pueblos). Conocílu años dempués y sé qu’era mui trabayador, mui atentu, mui atrevíu y, como joi pastor n’otras vegas (dellas más bien roínas) y tenía güena memoria, el nacíu de Caín que sabía de topónimos d’un llau y otru del puertu del pueblu.
   Y n’Ariu taban, Leoncia, Cirilo y los más de los jiyos, nel mes de xunucu de 1976, cuando los que mandaban entós quisieren que jora ellí xente pa grabar cómo era la vida d’ellos.
   Pero no pudió ser, pos según mos cunta la revista asturiana Enol nel so númeru 28/29, de diciembre de 1976, páxina 39: “¡Lástima!, decimos nosotros, que se haya malogrado este año, el reportaje, que para T. V. E. se iba a realizar en julio pasado, sobre la vida de Cirilo en Ario, cuando ya estaba todo dispuesto y el equipo de cámaras en Covadonga, pero una orden de última hora, dispuso su traslado a Galicia, cuando la visita del Rey a esa Región”.
   Y quedámonos sin tener un rexistru audiovisual sobre cómo era la vida d'unos pastores de los más nombraos d'esi tiempu. Piense el lletor qué valía más, lo que se grabó en Galicia, asuntu, el de los viaxes de reyes, sobre el qu’hai miles grabaciones, o lo que quedó sin grabar nel Puertu Onís.

    Ramón