NOTICIES DE MAYU

[astúricu]

--------------------------------------------------------------------------------



El Foru de Barcelona va falar de la diversidá llinguística


El Foru Universal de les Cultures - Barcelona 2004 tien previsto entamar unos alcuentros entitulaos Diálogu sobre diversidá llinguística, sostenibilidá y paz que van facese per conferencies plenaries y talleres al empar. El tema sedrá la necesidá de preservar les llingues del mundu, ente les que s'alcuentra l'asturiana, y parar los procesos de sustitución llinguística alrodiu del mundu. Les persones ya entidaes interesaes en caltener la diversidá llinguística puen surdir propuestes pa contrarrestar el procesu d'homoxeneización idiomática al que ta sometíu el planeta y ufrir soluciones sobre planificación y polítiques llinguístiques.
Linguapax.org, con llar central en Barcelona, naz d'una iniciativa de l'UNESCO pa solucionar los problemes de conflictos llinguísticos y culturales y promover la paz pel respetu a la diversidá llinguística y a la educación multillingue. Esti Foru va facese en Barcelona del 9 de mayu al 26 de setiembre del 2004 y dientro del Diálogu que ye abiertu a la participación de toos. Tán convidaos asina espertos d'instituciones como l'Institutu Max Planck d'Antropoloxía de Pensilvania o universidaes como les d'Oxford, Perth, Carleton, Edimburgu, India, Suráfrica o Barcelona ya institutos como la Fundación pa les Llingues en Peligru o Terralingua.

Nel Foru falaráse del númberu de llingues énte la tendencia homoxeneizadora y de los procesos de sustitución llinguística, de la perda de la diversidá cultural y en concreto llinguística como fenómenu que non sólo afecta a Asturies sinon a tol planeta, de la intensidá d'esa menacia y de la reacción ante les tendencies hexemóniques.
Tamién se falará d'aspectos como los llazos ente cultura y entornu, ecoloxía llinguística y relaciones ente diversidá biolóxica y diversidá llinguística, promoción del multillinguismu, respetu pola diversidá llinguística basao na coesistencia harmónica de les comunidaes, derechos llinguísticos tanto individuales o colectivos como derechos fundamentales del ser humanu, resolución de conflictos llinguísticos y promoción de la paz.

Los talleres tratarán de debatir sobre: Modelos positivos de polítiques llinguístiques, que sirvan como modelos de referencia (Quebec, Israel, Países Bálticos) ; Estudios de casos de revitalización y estandarización llinguística, que testimonien el resurdimientu de llingues amenazaes, el papel de les nueves tecnoloxíes nes estratexes de revitalización y la importancia de la planificación del corpus y del estatus nos procesos de promoción y protección de les llingues; Balances de la investigación sociollinguística; Llexislación y derechos llinguísticos nel mundu: Carta Europea de Llingues Rexonales y Declaración Universal sobre Derechos Llinguísticos; Axentes de la defensa de la diversidá llinguística, qu'analizará la importancia de les ONG ya instituciones de la sociedá civil na defensa y llucha pola preservación de la diversidá asina como la participación d'estes organizaciones non-guvernamentales nel diseñu de programes de defensa de llingues en peligru y llinies d'actuación a favor de les mesmes.
La sede del Foru atópase na cai Mayorca 285 - 08037 Barcelona.



--------------------------------------------------------------------------------




Acusen a Felipe Borbón de cínicu
por engañar a tou un país en llutu

El fíu del actual xefe del Estáu hespañol, Felipe Borbón, dexó prácticamente a tola ciudadanía ablucao en sabiendo que festexara la so despedida de solteru fuera del país, nes Islles Bahames, alloñándose asina de la murnia situación de llutu oficial y públicu na que vivía el país pola mor de los acontecimientos del 11 de Marzu na estación d'Atocha en Madrid onde delles bombes mataron a cuasi 200 persones. L'actitú del que se supón ye candidatu a presidir la xefatura nel futuru, califícase en cuasi tolos ámbitos como una amuesa impropia de cinismu ya hipocresía, inherente según otros, a toles monarquíes, pol fechu de qu'el mesmu Felipe Borbón xunto cola novia Letizia Ortiz anunciaren que suspendíen los festexos de prometíos y les despedides de solteros n'homenaxe a les víctimes morlates de los atentaos del 11-M, pa respetar el llutu de los familiares y de tola ciudadanía y que amás daríen el dineru públicu que costaríen les fiestes pa pagar un monumentu a les víctimes. Ye la prensa la que destapa que los novios y previsiblemente futuros xefes del Estáu, llamaron a un ricu magnate venezolanu pa que-yos pagara los gastos de viaxe y estancia nun luxosu complexu hoteleru de les Bahames pa ellos y pa otros 36 amigos pa cellebrar en secretu y al marxe del país les sos fiestes de solteros, y evitar tanto el llutu del pueblu como la fiscalización de los contribuyentes. L'escándalu nun foi a mayores debío a la censura mediática qu'arrodia tolo referente a la nomada "Casa Real" hespañola pero sábese del fondu disgustu esistente nel palaciu de Zarzuela pol viaxe d'incógnitu. La pareya regresó del viaxe de placer hores enantes d'un funeral poles mesmes víctimes que se fizo en Palma de Mayorca. Nesti actu relegaron a la folixera pareya nel protocolu como síntoma del disgustu esistente pola mentada despedida de solteros nel Caribe, lloñe del país. La fiesta nes Bahames diba ser d'incógnitu de nun ser pol escándalu qu'entamó Felipe Borbón énte les autoridaes policiales de los EEXX al ñegase arrogantemente nel aeropuertu de Miami a pasar el control d'aduanes como un ciudadanu más alegando qu'él yera "un príncipe" y consideraba los rexistros policiales como una falta al respetu de la so persona, petición que denegó la policía de Florida yá que rexistró a la pareya como a toos siguiendo estrictes medides de seguridá tres los atentaos nes torres ximielges de Nueva York. Sobre la conocida o supuesta homosexualidá del herederu, hai quién camienta qu'esta boda ye otra preba más de los engaños y asuntos "tapaos" al pueblu por parte de la monarquía, que siempre trata d'ocultar incluso pola fuerza policial que la ciudadanía conoza la realidá de les sos vides. Nesti sentíu, los testimonios qu'apunten de les visites de Letizia Ortiz a la clínica Dexeus de Barcelona, esperta en reproducción asistida, califíquense de bochornoses. Tamién trascenció a los medios la noticia de qu'el principe dexaría too y mandaría too "a paseo" si ésta vegada nun aceptaben a la nueva "novia" seleccionada.
Per otru llau tamién cabe dicir que nel país yá se sabe de la riestra de relaciones amoroses del xefe del Estáu con conocíes actrices, cantantes o presentadores, de les qu'incluso se diz que puea esistir una hipotética desdendencia extra-matrimonial, inda non confirmada, y a les qu'investigó'l propiu CESID. La hipocresía que trata d'institucionalizar la monárquía nel protocolu y na familia, y que nel pasáu-yos llevó a discriminar y marxinar al propiu tíu del rei, Don Leandro Borbón Ruiz, tamién-yos obliga a esperar a que se casen Felipe y Letizia p'anunciar el posible divorciu d'Elena Borbón, segunda candidata a la xefatura d'Estáu por ser muyer, y casada con un adictu a les droges dures que-y produxeron por ello un derrame cerebral del qu'inda ta en tratamientu.


--------------------------------------------------------------------------------